動物農莊

如果你未睇過動物農莊嘅故事，我建議你直接跳過呢個序，睇完本書再返嚟。之不過，英文原著面世已經成七十幾年，未睇過個故事，但又無視上句劇透警告嘅人，就莫怪我無情。

對我嚟講，《動物農莊》唔係要警惕世人獨裁專權嘅禍害，而係一個「得語言者得天下」嘅故事。語言有唔同嘅部份，有你而家見到、印響紙上面嘅符號，有我哋口講嘅音調，牆上嘅七誡，乃至動物農莊嘅國歌《英島眾獸》，雖然個符號係用廣東話，但實際上其實係農莊嘅動物嘅語言嚟。只有推翻咗人類嘅農莊動物，先可以切身體會呢啲符號箇中嘅意義。

農莊牆上之所以有七誡，係因為響動物眼中，人類就係罪惡同貪婪嘅化身，動物要用呢七誡嚟突顯自己同人類嘅分別。班綿羊成日嗌嘅「四腳好，兩腳壞」亦係呢個意思。後來，呢七誡俾以拿破崙為首嘅領袖改寫，口號亦都變成「四腳好，兩腳更好」，除咗係方便班革命領袖享樂，更大嘅影響係模糊咗人獸之間（正義同罪惡之間）嘅界線。

農莊嘅國歌由振奮獸心嘅《英島眾獸》，一步步被篡改成《拿破崙萬歲》時，動物嘅革命就已經由破舊立新、上刀山落油鑊嘅激情，變質成個人崇拜嘅集體瘋狂。

對於個人，語言係思想嘅載體，對外嘅橋樑。對於一個群體，語言除咗係個體之間溝通嘅工具，同埋身份認同嘅界線之外，最重要係將時間重疊，將過去嘅神話同傳說，駁落我哋而家對未來嘅想像度。傳承過去，思考未來，呢個先係語言對於一個族群而言，最重要嘅功用。

動物嘅語言被篡改扭曲，其實唔止係抹走佢哋嘅身份同歷史，更重要嘅係令佢哋想像唔到自己嘅未來。佢哋唔記得咗革命之前嘅承諾，就唔會想像到以後應有嘅好生活。佢哋忘記咗農莊嘅英雄，就想像唔到領袖嘅絕對腐化。

唯一洞悉到動物農莊嘅大話，就只有老驢班哲文（Benjamin），但佢只會敢怒不敢言。每聽到一個大話，佢就響齒間漏一兩句怨氣，發洩完之後就繼續旁觀。佢痛恨史叫拿（Squealer）搬弄是非，但又為咗自保，唔敢公開辯清。農莊其他動物字都唔識多隻，未見過世面，不知者不罪，但班哲文知者不言，唔係幫兇，都至少唔係無辜。革命墮落，佢作為罪人之一，懲罰就係行屍走肉，毫無熱情可言。

一個人冇夢想同條鹹魚冇分別，同理，一個群體冇咗未來嘅想像，同一條又一條嘅鹹魚都冇分別。要守護自己嘅故事同夢想，就要由自己嘅語言做起。語言冇咗思想就會變得無味，冇咗行動就會變得空洞。我相信譯者搞得呢本書，唔係想大家睇完本嘢之後，直接擺入書櫃封塵，而係拎出嚟同其他人傾下，諗下大家一齊有咩可以做。前路茫茫，但唔好因此苟且。唔好變成另一個班哲文。共勉之。