蔡偉泉
《廣東話版》序
廣東話又稱粵語、廣府話或廣州話。在學術界，以「粵語」一稱最為普遍，本書則採用大眾較為熟識的「廣東話」稱呼。
廣東話是漢語語族下的其中一個語言，主要流通在中國廣東省一帶，因而得名。然而，得指出兩點。第一，並非整個廣東省皆以廣東話為母語，譬如東北一帶以操客家話為主，而粵東則以閩南話為主；第二，廣東話也流通在廣東省以外的地方，例如香港、澳門、大馬和其他一些海外華人社區。據統計，全球以廣東話為母語的人口最少有6千2百萬人，位列全球最多母語人口的首30名內。
《小王子廣東話版》的面世，一方面希望為說廣東話的朋友，帶來一個更親切的方式去認識和欣賞《小王子》一書裏面的人生道理；另一方面也希望藉着這本膾炙人口的名著，向對廣東話感興趣的朋友介紹一下我們的語言——這包括了廣東話以外的其他漢語使用者。故此，本序言以及凡例皆以標準中文書寫。另外，也為操非漢語語言的朋友準備了Notes for Collectors，好讓他們了解這個有趣的語言。
在此，我想感謝Zoe為這本廣東話譯本的付出。她過往旅行的時候為我帶回了多本不同語言的《小王子》，希望有了這本自己的《小王子》以後，她可以換到更多罕有的版本。我也想感謝Suki，她對廣東話及其他漢語語言有深入的認識，給了我許多寶貴的意見。此外，葉嘉教授和王劍凡教授分別都在翻譯細節上給了我很多提點，使我獲益不淺。最後，當然少不了兩位插畫師Aria和KH，沒有她們精彩的演繹，這本書必定失色不少。還有為這本書手寫書法的Cheryl。她向來熟習正統書法，這次要她屈就寫可愛字體，幸好她沒有拒絕，不然我實在找不到更好的人選。在此，再次向每一位說一聲衷心感激。
這本《小王子廣東話版》從計劃開始至真正出版，前後經歷了六年，這六年裏我一直耿耿於懷，想把這心願完成。現在這願望終於成真，我可以用廣東話對這本《小王子》說：「你同所有其他嘅《小王子》都唔同，因為我花喺你身上嘅時間，已經令你變得獨一無二！」
《香港粵拼版》序
要出一本全書標註粵拼嘅《小王子》版本呢個諗法，其實早喺2017年《小王子廣東話版》面世之前就已經有。當時我哋覺得呢本書其中一批目標讀者，就係本身母語並非粵語，而又正係學緊粵語嘅學習者。當中主要可以分為移居海外操粵語華人嘅後代（即係竹昇仔、竹昇妹），同有意學習粵語語言文化嘅外國人。無論係邊一類都好，一本註有粵拼嘅讀本都應該係好有用嘅學習教材。至於對本身操粵語嘅讀者嚟講，呢本書一方面可以作為學習粵拼之用，另一方面亦可以係普及粵文書寫嘅一嚿踏腳石。畢竟，好有多廣東話字並冇標準寫法，唯有將讀音同時標記，先可以確保譯者同讀者能夠準確噉透過語言交流、溝通。
但2017年我哋最尾都冇出到粵拼版，主要係因為呢項工程聽落去好似都幾艱鉅噉，當時未有呢個決心去做。直到今年，終於扚起心肝想完成咗佢。但明白咗「一枝竹仔會易折彎，幾枝竹一扎段折難」嘅道理，決定搵下身邊有冇朋友可以幫手一齊「打大佬」，點知搞《粵典》嘅阿擇好爽快噉一口就應承咗我。
我哋一開始就打算先用電腦自動為文字配上粵拼，再進行人手校對修正錯配嘅拼音。的確，噉樣做可以慳返好多時間，而且準確度都算幾好。
喺阿擇同佢其他粵典嘅朋友用語音方法進行修正之後，我哋最後都再做咗兩輪逐字審核嘅人手校對。呢個部份相對上都幾花時間，所以我必須要特別多謝幫我手嘅Zoe林慧雯同Vanessa曾泳欣。佢哋一位係我嘅師姐（我冇乜噉叫過佢，因為佢其實都唔大我好多），當年係讀中大語言學系嘅前身「磨𡃁溝」（Modern Languages and Cultures）；另一位就係我喺中大語言學系嘅師妹。幾代CU Ling人聚首一堂，能夠為自己嘅母語做一啲嘢，我諗，都算係一件幾有意義嘅事。
校對完粵拼之後，剩低落嚟嘅難題就係排版。唔知點解，網上關於注音排版嘅資料少之又少。本來以為可以直接將文字同拼音寫成HTML嘅格式，再匯入到InDesign入面，但後來發現此路不通。最後研究咗一輪InDesign嘅檔案格式之後，寫咗一個程式將阿擇匯出嚟嘅粵拼格式轉換成InDesign所需要嘅特定格式，然後終於成功匯入到成篇文字。有少少無奈噉講，呢個過程係有啲技術性，唔係太方便容易，希望將來呢方面嘅軟件支援可以多一啲啦。
最後，有朋友問點解呢本書唔叫返《廣東話版》，其實係因為想突出返呢個係有粵拼嘅版本，等讀者搵呢本書嘅時候容易啲。又由於《廣東話加粵拼版》太累贅，最後就決定叫《香港粵拼版》。而由於呢本書叫《香港粵拼版》，我哋同時推出嘅另一本廣東話翻譯文學作品就叫咗做《動物農莊香港粵文版》，以求統一。