劉擇明博士
《粵典》創辦人
香港粵拼版終於出世喇！呢本應該係全香港第一本全文標註粵拼嘅書。好多謝蔡偉泉俾個機會我哋為呢本書加粵拼，感謝崔頌文、陳詠恩、彭愷琳幫手校對，仲有《粵典》（words.hk）、冚唪唥粵文（hambaanglaang.hk）、PyCantonese、粵語基建組 CanCLID 嘅技術支援。
多謝完大家，想講下心情。推廣粵拼真係一啲都唔易，好多人先入為主覺得推廣粵拼好無謂：香港嘅識字率貼近 100%，識粵文嘅人肯定識漢字，喺全本書上面加粵拼，係咪冇嘢揾嘢嚟搞？
請容許我用例子答你。讀香港大學嗰陣每日都去嘅本部大樓，側門放咗一塊好礙眼嘅斜板，拍埋百年歷史建築嘅石柱同木地板，格格不入，破壞晒個古典格調。直至有次自己用手推車搬嘢，先至明白喺兩吋高嘅地台前面，嗰塊斜板係幾咁有用。我覺得整粵拼版，就係好似平日鋪平啲路，裝斜板斜台，整好啲欄杆一類嘅事。諗諗學緊粵語嘅朋友，諗諗喺海外傳承粵語嘅人，希望大家唔會介意漢字上面加咗啲粵拼，支持我哋喺適當嘅地方，裝返幾塊斜板，幫助有需要嘅人。每整一本粵文書，每做一份粵拼材料，都係為粵語做緊一份功德。我哋唔敢話用一己之力去改變世界，但係我深信只要好多人都用少少時間去揼石仔，去做一啲睇嚟冇用嘅事，最終係會令我哋嘅世界變得更加美好嘅。
我可以寫多幾千字講點解要加粵拼，但係我更加想順便喺度分享我哋加粵拼嘅方法。全書有兩萬幾字，為咗加速，我哋並唔係人手加粵拼，而係首先用 pycantonese 做分詞同粵拼，再人手校對一啲多音字（畫 waa2/waak6，上 soeng5/soeng6 等等）。肉眼快睇一次之後，再放粵拼去 Text-to-Speech 系統，聽住錄音去揾出漏網之魚。推廣粵拼唔係做苦行僧，我哋都只係善用工具去行多一細步，過程唔算好辛苦。希望其他寫書嘅朋友都考慮整多個粵拼版啦。
2021年6月25號 @香港