邢影
《伊索傳》、《驢仔》譯者
大學嗰陣，上過一個學期嘅德文發音。當年年少無知，只係沿用中學時代嘅學習態度同方法︰老師餵乜，自己就照聽照抄，不求甚解，但求用最少嘅痛苦過關。
點知同班就有 Thomas 呢個人，硬係會自己搵書睇，比對返老師嘅講法，再喺堂上邊公然叫陣，挑戰權威。成班同學諗都冇諗過，身邊居然有個噉嘅痴線佬！睇住老師慢慢招架唔住，表情同語氣慢慢由淡定變嚴肅，我哋居然唔係諗吓孰是孰非，而係諗︰算啦，Thomas，唔好同佢撐落去喇！
當我哋個個揀咗混混噩噩，Thomas 就堅持一士諤諤。
所以，由佢翻譯《動物農莊》，真係最適合不過。農莊入邊嘅拿破崙愈嚟愈污糟邋遢、乖謬荒悖，其實一啲都唔意外，因為「Power tends to corrupt, and absolute power corrupts absolutely」，呢啲老生常談真係顯而易見。但一隻手掌係拍唔響嘅。如果呢班動物有 Thomas 呢種對真相嘅堅持，肯花時間同精神對自己嘅生命負責，拒絕人云亦云，遇到唔合理嘅事又會勇於表達意見，就點會俾班豬喺股掌之中玩弄？拿破崙固之然乞人憎，但呢班可憐嘅動物就好似魯迅話齋，必有可恨之處。
而喺呢班動物度，我就睇到自己當年學德文發音嘅影子喇。唔怪之孟子都話︰人之所以異於禽獸者幾希。
當然，呢本書嘅意義又點止咁簡單丫。身處呢個世代，有呢種當頭棒喝（對人性嘅敗壞又好、對人心嘅麻木又好），當然好多人都想借用嚟互相提醒。Thomas 邀請我寫序冇幾耐，亦聽聞有另一批有心人用廣東話翻譯《動物農莊》，出版時間仲要重疊晒。噉嘅巧合，令我諗起《三都賦》嘅故仔︰
初，陸機入洛，欲為此賦，聞思作之，撫掌而笑，與弟雲書曰︰「此間有傖父，欲作《三都賦》。須其成，當以覆酒甕耳。」及思賦出，機絕歎伏，以為不能加也，遂輟筆焉。
以廣東話嘅處境、以世道嘅艱難，百花齊放一定係好事。讀邊個《動物農莊》個廣東話譯本都好，希望大家唔會淨係用嚟冚酒甕，而係可以享受文字、欣賞廣東話嘅妙處同潛能，同埋保持警覺、保守初心。