小王子橫越過沙漠,途中只係見到一朵花。一朵有三塊花瓣嘅花,一朵一啲都唔起眼嘅花。
「你好。」小王子講。
「你好。」花講。
「請問啲人喺邊度?」小王子好有禮貌噉問。
花曾經有一日見過有隊駱駝商隊經過。
「啲人?好似有六、七個呀,我諗。好多年前見過佢哋。不過唔知要去邊先搵到佢哋喇。大風將佢哋吹嚟吹去。佢哋冇根,日子一定過得好辛苦。」
「再見!」小王子講。
「再見!」花講。